اريد مشورتكم... ادور اسم لمحلي

[ظبيانية]

السلام عليكم

شخباركم عساكم بخير :)

انا بإذن الله بديت اول خطوة في مشروعي...

كوفي شوب

المخطط انه يكون نصه كباين للعائلات ونصه مساحه طاولات مفتوحه على بعض لارضاء الذوقين

اريد افكار من عندكم بالنسبة للاسم!!!

محتارة وايد ومب عارف شو اسمي

لا تبخلون علي كل اللي عنده فكرة يحطها الله يخليكم

انا مفكرة في me casa وهي كلمه تعني "بيتي" باللغة الاسبانية

بس مب مقتنعه وايد يا ريت تساعدوني :)

اتريا ردودكم

[ابن_الوطن]

try this


Last Drop Stop

or
Humble Crumble

or

Sip Coffee

or

zucchero means sugar in italian


or

swan coffee



اتمنى يعجبك واحد على الاقل

[اللافى]

من خبرتى فى التسويق والاعلان مشروعك نسبة نجاحة 30%

[ظبيانية]

اخوي ابن الوطن شكراااااااااااااااااااا جزيلا
كل الاسامي اللي قلتها اغلبها ما يناسب الكوفي اللي بسويه.. لان ستايله اسباني

بس اسم زوتشيرو عيبني واااااااااااااااايد.. وبيكون احد الاحتمالات انشالله

وشكرا اخي مرة ثانية

واذا عندك اسامي ثانية بالاسباني او ايطالي لا تبخل علي :)

[ظبيانية]

من خبرتى فى التسويق والاعلان مشروعك نسبة نجاحة 30%


اخوي اللافي... من خبرتك في التسويق والاعلان... ممكن تقوللي شو الاسباب بارك الله فيك!!!

اما انك تدش موضوعي ومن غير اسباب تقولي مشروعج بينجح بس بنسبة 30% فهذا نوع من التخويف ما له داعي...

ألسيت نسبة النجاح تختلف من موقع الى اخر ومن بلد الى اخر... انا ما اعرف من اي بلد انت.. بس انا من بوظبي فهل الدراسة اللي تتكلم عنها هي دراسة لسوق ابوظبي واحتياجاته!!!

للعلم انا لست انسانه جاهلة وداخله بحر ما اعرف اخره.. انا عندي ماجستير في الاقتصاد الدولي ودارسة تسويق بعد

وياليت تناقشني او تفيدني اذا عندك شي للافاده

وتقبل اخي تحياتي

[™ أمل راحل ™]

ظبيانيه اختي بدايه ان شاءالله مشروعك ينجح بنسبه 100% بتوفيق الله اولا ثم بما سيحتوي عليه الكوفي شوب حقك اهم شئ تراعي الله في كل امورك وعملك خاصه وصدقيني ربنا راح يبارلك في رزقك حتى وان كان بنظر الآخرين سيفشل سواء كان بسبب كثرة الكوفي شوب هذه الايام او اياً كان السبب اهم شئ توكلي على الله وحطي ربك امام عينك عشان ربنا يبارك لك في حلالك... وبالتوفيق

أختك أمل راحل

[ظبيانية]

تسلمين اختي امل راحل
ما قصرتي والله يوفق جميع المسلمين

شكرا عزيزتي على تشجيعج :)

[ابن_الوطن]

كذا تمام مدام واحد عجبك كذا نقدر نقول

انه حصلنا عن وحده ايسبرسو من عندك بس ياريت تكون دبل عشان الواحد يتكيف صحيح


على فكره انتي اذا تبي المشروع ينجح لازم يكون vip من كل شي من الاجواء الداخلية

والخدمات وركزي على الديكور الداخلي كل ما كان غريب ومتطور كل ما كان احلى


وبالنسبة للاسماء راح احاولك فيها

[ابن_الوطن]

تفضلي بعض الاسماء الاسبانية والايطالية

هذا الي قدرت عليه واتمنى واحد منها يعجبك وكمان الباقين ماراح يقصرو طبعا


========================





Sanjula= beautiful

Alzena=the women

Andraya=trusted by God

Aparna=same as Parvati

Zerlina=Beautiful Dawn

Belladonna=beautiful woman

Rosalia=Melody

Venitia=Mercy

Zola=ball of earth

Rocco=rest

Fiorenza= flower

Caprice= fanciful, unpredictable

Bianca=white


===================


بالتوفيق ان شاء الله

اخوك ابن الوطن

[نـدى]

احسن لازم يكوووون الاسم عربي

سميه عذاري

[ظبيانية]

تسلم اخوي ابن الوطن ما قصرت ويعطيك الف عافية :)
روكو عيبني وايد.. لان معناه الراحه وانا ابا اسوي شغل على الاضاءة بحيث انها تعطي منظر مريح واايد

تسلم مرة ثانية :)

ولا تخاف ... دوم الكوفي على حساب المحل متى ما شرفت :)

[ظبيانية]

اختي ندى... شكرا على الاقتراح
بعد اسم عربي بيكون حلو... بس عذاري :rolleyes: اسم بنيه.. وما اريد اسم الكوفي باسم بنت

فكريلي في اسم ثاني حلو :)

[الشامخ ####]

اتمنى من الكوفي انه مايكون تقليدي
وانه يكون بستايل جديد ومختلف
واهتمي بديكور شوي
حتى الاسم بامكانك تبدعي فيه
وانه يكون جديد وماهو مستهلك
ولاتنسي المنتجات اللي تقدمها
لابد تكون بجوده عاليه وبالسعر منافس
واعطينا الموقع علشان نضمن عندك فنجان ميكاتو مزبوط
وبالتوفيق ان شالله

[المكافحه]

اختي تبين نصيحه شوفي احد المشروبات التي تقدمينها وتكون علامة الجوده للمحل يعني الناس بتجي لمحلك بس عشان هالمشروب المميز وسمي بها تحياتي

[أنا]

بسم الله الرحمن الرحيم

أختي ظبيانية

توكلي على الله وأفتحي مشروعك وأنا أقولك ناجح مليون في المائة

أما بنسبة للأسم أعتقد عندك في الإمارات مفتوح لكم الإختيار الاسم مو مقيد مثلنا في المملكة العربية السعودية يكون محدد و فوق كذا أذا كان غريب لازم تجيب المعنى حقة


بالتوفيق أختي ظبيانية

[ظبيانية]

تسلمين اختي "انا" على تشجيعك وما قصرتي
وشكرا على مرورج :)

[بن سعد]

فعلا انا استغرب من رد اللافي !!!!!!!!!
بدون يعرف مكان المشروع او البلد اعطى قراره .
والاستغراب اكثر عندما ربط الاعلان والتسويق بأسم المشروع ,,
عموما
خطر على بالي اسم (( كوفينا )) او (( تلاقينا ))