انا اسمي خالد والجيران بسموني اليتيم ..

[مطور الاعمال]

مرحبا يا ناس .. انا اسمي خالد .. رفقاتي بالمدرسة والجيران بسموني اليتيم ..
اختي روى قالتلي لاتزعل .. اليتيم يعني البطل ..
بس لكن ليش يقولوا ( يا حرام هاد اليتيم ) ..؟!!!
عمري .. ما بعرف .. بس أنا كبير كتير .. لأنو ماما دايما بتقلي انت رجال البيت ..
بابا اسمو سعيد ..بس ما بعرف ليش العالم دائما بقولولي بابا اسمو شهيد مو سعيد
سألت الماما .. قالتلي البابا سافر حتى يجبنا اكل ومصاري والعاب .. بس أنا عم جوع كتير بالليل
بقلها لماما بدي آكل .. بتقلي حبيبي قوم حتى ننام الملايكة رح تطعميك وانت نايم ..
هي بتخبي عيونها حتى ما تخليني شوفها عم تبكي .. بس أنا بشوف دموعها بسألها ماما شبك ..
بتقلي ما في شي حبيبي يلا نام على التخت .. ولما بحط راسي على المخدة .. بصير ببكي ..
ما بعرف ليش .. بس كلما شوف الماما عم تبكي .. ببكي ..
تختي مو حلو .. ما بيشبه التخت يلي بشوفو فأفلام الكرتون .. هداك التخت بكون عالي ..
أنا تختي قريب على الارض .. عملتلي ياه الماما واطي حتى ما أوقع بالليل اذا تقلبت..
ماما كتير بتحبني .. كلما تشوفني عم احضر توم وجيري بتقعد جنبي وبتضمني على صدرها وبتقلي
خالد .. ان شا الله بكره بس الله رزقنا بدي جبلك تلفزيون ملون وبتحضر توم وجيري طول اليوم

اختي روى كتير حبابه .. بحبها كتير .. احيانا لما بتكون ماما عند الجارة روى بتعطيني مصريات ..
بتقلي خالد روح اشتري من الدكان شو ما بدك .. بس لا تخلي ماما تشوفك ..
مرة سمعت ماما عم تقول لروى انو ما لازم يعطوني مصريات كتير .. حتى ما اتعود ..
مع انو كل يوم رفقاتي بروحو بيشترو من عند البياع وما بيتعودوا ..
روى كانت شاطرة كتير بالمدرسة .. بس تركت المدرسة .. لأنها كبرت وماما ما عادت تقدر
تعطيها مصريات كتير من شان تشتري بدلة وكتب للدراسة ..
روى هلأ عم بتساعد ماما بالبيت .. مرة عملت كاتو كتير طيب .. بس ما عادت تعمل كاتو ..
لأنو البياع بحارتنا رفع سعر الكاتو قبل ما نحطو بالفرن .. ولما ماما سألتو ليش هيك عم تغلي ..
قال والله مو بايدي قال انو هيك الاسعار عم تجي .. بس هو كذاب ..أصلا هو ما بحبنا ..
دائما بخانق الماما لأنها ما عم تدفعلو الدينات ..
يا حرام يا ماما .. كتير بتبكي منشانا .. وحياة الله بكره بس اكبر ويصير الي عضلات بدي
اضربو لكل واحد بزعل الماما ..

أحيانا بشوف احلام مو حلوة .. بفيق خايف وبصير بنادي للماما وببكي ..
بتحملني وبتنيمني جنبها .. وبس ماما تغفى بطلع عليها وبشوفها عرقانة كتير .. هي كمان بتشوف احلام مو حلوة
وبتصير تحكي بنومها وبتقول : سعيد وينك .. لا تتركني لحالي سعيد .. رجاع كرمال الله ..
لما اسمعها هيك عم تحكي بخاف .. بفيئها .. بتفيق مرعوبة بتضمني وبتبكي .. بعود انا ببكي معها ..
بس روى ما بتكون حاسة .. لأنو روى بتكون نايمة .. لأنها بتتعب كتير بالنهار ..
وهي لازمة تفيق الصبح بكير حتى تحضري صندويشة الزعتر ..
أنا بحب يوم الأحد لأنو كل احد بيعوطي مصريات حتى اشتري عصير بالفرصة واشربو مع الصندويشة

مرة اجو لعنا عالم .. دخلوا لعنا وعطوها مصريات لماما .. قال لأنو بابا مسافر وبجوز يطزل ليرجع ..
دائما بشتقلو لبابا .. بعرف انو هو كمان مشتقلي .. احيانا بطل من الشباك وبصير بستناه ..
بتخيلو عم يدخل من الباب وهو حاملي العاب وهدايا .. سألت روى ليش ما بتحطي بايدك اساور متل رفقاتك ..
بتضحكلي وبتقلي انها هي كمان عم تنتظر البابا لأنو رح يجبلها معو اسوارات كتير ..

ياالله يا بابا .. ايمتى بدك تجي .. ايمتى بدك تجي تمسح دموع الماما ..؟ ايمتى بدك ترجع الفرحة لروى ..؟
ايمتى بدك تاخدني مشاوير متل رفقاتي .. ياالله يا بابا .. تعى حاج سفر .. كلياتنا عم نستناك ..بكفي ..
تعى اشتقنالك ..
.........
......
....
..
.


ترهات ريشة ..

اعجبتني واحببت ان اشارككم بها ( مطور الاعمال)

[جهبذ]

تتعدد الاسباب والموت واحد
تتعدد اللهجات والوجوع واحد
ذكرتني بقصص زمان لكن اختلفت اللهجة من النجدية للشامية
شكرا لك اخي مطور الاعمال على هذا الطرح الجميل
هذا بجانب تطوير الاعمال براعتك باختيار القصة والرواية الجميلة
يعطيك العافية
ودمت بود

[طموح انثى]

اخي مطور لاعمال

ابدعت في اختيار القصة

معاني كبيره بريشه طفوليه عشنا معها والمتنا كثير

الف شكر لك دمت بخير

[مطور الاعمال]

اخي جهبذ
بكل اللهجات اشكر لك مشاركتك ومرورك الكريم

اختي طموح انثى
العفو .... وان دل ذلك على شيء فانما يدل احساسك الراقي

تحياتي للجميع